I går sa eg ‘hadet’ til dei andre europeiske frivillige og reiste heim igjen til Erfurt. Dei siste ti dagane har eg nemleg vore på EVS-seminar i Witzenhausen. Då arbeidsgivaren min fortalde meg at eg skulle på eit ti dagar langt seminar, var eg ganske så skeptisk. Eg sa på tull, at eg heller ville arbeide. MEN eg er veldig glad for at eg reiste på innføringsseminaret. På dette seminaret gjekk det t.d. opp for meg, kva eg eigentleg er – EVS = European Voluntary Service. Greit å veta.
Til saman var me 21 frivillige. Alt i frå russarar til kinesarar (ok, det var berre ei i frå Kina) var på seminaret. Me lærte om identitet, rettar og plikter, forsikring, tysk historie, andre kulturar, leikar, språk og mykje anna. I tillegg lærte me om kvarandre sine interesser. Eg hadde eit dramakurs for ei lita gruppe. Dei skulle dramatisere “De tre bukkene bruse” på tysk. Det var utruleg moro å sjå på. Sjølv deltok eg på eit photoshopkurs og på eit sjongleringskurs. Begge deler var veldig kjekt. Eg har som mål å lære meg å sjonglere før nyttår. Eg har laga tre ballar av ballongar, ris og nylonstrømpebukser.
Desse ti dagane gjekk utruleg fort og eg saknar den sprø gjengen av frivillige. Me var med kvarandre dagen lang. Det var nesten som å gå på folkehøgskule, berre at me måtte lage middagen (altså 8/9-tida) sjølv. Kveldane vart òg veldig lange for nokre. Me spelte billiard, fotballspel, ping pong, kortskalle, 10000 (eg lærte dei det festelege spelet) og høyrte god musikk. Heldigvis begynte me først kl 09.30 kvar morgon.
No er eg som sagt tilbake i Erfurt og eg har fri til neste tysdag faktisk, for på måndag er det 3.oktober. Det er herleg å ha fri. Eg har vaska og rydda rommet. Dei nyvaska kleda mine heng til tørk i sola og eg går i shorts. Her er det varmt! Til helga reiser eg til familien i Rüdesheim og blir der over nasjonaldagen. Eg gledar meg!
Livet i Witzenhausen
Sjongleringsballar
