Her på Sagavoll er det veldig advent for tida. Alle etasjane er mellom anna med i ein julepyntkonkurranse. Nokre tykkjer at litt granbar og nokre stearinlys er grei pynting, medan andre dekorerer etasjen sin med farga blinkelys, blitslys og strippestang. Kvar har sin smak. I tillegg til pyntekonkurranse, har me òg hatt peparkakehuskonkurranse. Etasjen min stilte opp med eit kapell med glasvindauge, noko som det viste seg at nesten alle andre òg hadde.
Elles blir det vist Amalies Jul kvar dag i tv-stova og det er moro å sjå kor mange som møter opp. Det plar sikkert vere omlag 30-40 elevar. I tillegg til å sjå Amalies Jul les eg Julemysteriet, som forresten er ei utruleg koseleg bok. Julemusikk blir også spelt på rommet og etasjen. Helst vil eg berre høyre Oslo Gospel Choir, fordi det er den musikken eg kjem i julestemning av, men sjølvsagt er eg open for mykje anna òg. Mamman min har vore så koseleg å sendt meg pakkekalender, så den prydar veggen min. Eg har òg ein siste adeventskalender; Appelsin med nellik.
Sist veke hadde me snø her i Gvarv og det vart laga nokre snømenn. Då hadde eg vell skikkeleg julestemning. No har vell mesteparten av snøen regna vekk, men det kjem sikkert ny snø snart. Eg hadde forresten oppvaskveke sist veke (Frå måndag til og med torsdag). Det var eigentleg ganske moro, men på torsdagen var det ikkje fullt så kjekt. Då vaska me sikkert opp i over 2 timar, grunna eit festmåltid med dessert. Me vart ferdige 45 minuttar før kveldsmat, då me hadde ein ny oppvask som venta oss. På torsdagen hadde me òg juleverkstad. Eg var med på: Julekort, Ull/Toving og julefilm.
Dei siste vekene har eg dessutan fått nokre nye valfag. På måndagar har eg kvardagspsykologi og på fredagar har eg basketball og glas. Alle faga er kjekke på kvar sin måte.
Elles presterte eg å tryne på rommet mitt for nokre veker sidan. Eg skulle opne opp døra mi ein morgon då det banka på, men før eg kom så langt låg eg på golvet. Det var ein morosam måte å vakne skikkeleg opp på.
Hanna akkurat no:
- Sjuk
- Litt lite julestemning
- Lei av å sove
- Gleder seg til å bli frisk!
